Monday, January 14, 2013

प्रधानमन्त्रीकै वेबसाइटमा गम्भीर त्रुटि

अजय शर्मा
काठमाडौं, पुस १० गते ।  सरकारको सूचना सही र सहज रूपमा जनतासमक्ष प्रवाह गर्ने प्रधानमन्त्री तथा मन्त्रिपरिषद् कार्यालयको वेबसाइटमै गम्भीर त्रुटि भेटिएको छ ।
प्रधानमन्त्री कार्यालयको वेबसाइटमा राखिएको प्रधानमन्त्री तथा मन्त्रिपरिषद्को कार्यविभाजनमा प्रधानमन्त्रीले सम्हालेका मन्त्रालयकै पूर्ण विवरण राखिएको छैन ।  वेबसाइटको नेपाली र अंग्रेजी भाषामा राखिएका कार्यविभाजनसम्बन्धी सूची एकआपसमा मिल्दैनन् ।
नेपाली भाषामा रहेको प्रधानमन्त्रीको कार्यविभाजनमा प्रधानमन्त्री, शहरी विकास, रक्षा, कानून, न्याय, संविधानसभा तथा संसदीय मामिला, कृषि विकास र युवा तथा खेलकूद, सामान्य प्रशासन, वाणिज्य तथा आपूर्ति, ऊर्जा मन्त्रालय उल्लेख छ भने अंग्रेजी भाषामा प्रधानमन्त्रीको मात्र जिम्मेवारी उल्लेख छ ।
नेपाली भाषामा उपप्रधानमन्त्री नारायणकाजी श्रेष्ठसँग परराष्ट्र, संघीय मामिला तथा स्थानीय विकासको जिम्मेवारी रहेको उल्लेख छ भने अंग्रेजी भाषामा परराष्ट्र र ऊर्जाको जिम्मेवारी छ ।  वेबसाइटमा अंग्रेजी भाषामा राखिएको कार्यविभाजनबमोजिम नारायणकाजी श्रेष्ठलाई ऊर्जामन्त्रीसमेत बनाइएको छ तर ऊर्जाको जिम्मा अहिले पनि प्रधानमन्त्रीसँगै छ ।
अर्का मन्त्री टोपबहादुर रायमाझीको जिम्मेवारीमा पनि त्रुटि छ ।  मन्त्रिपरिषद्को वेबसाइटमा नेपाली भाषाको कार्यविभाजनअन्तर्गत उहाँलाई शान्ति तथा पुनःनिर्माण, भूमिसुधार तथा व्यवस्था मन्त्रालयको अधिकार दिइएको छ भने सोही वेबसाइटको अंग्रेजी भाषाको कार्यविभाजन सूचीमा उहाँलाई शान्ति तथा पुनःनिर्माण, भूमिसुधार तथा व्यवस्था र स्थानीय विकास मन्त्रालयको जिम्मेवारी पनि दिइएको छ तर कार्यविभाजन अनुसारस्थानीय विकासको जिम्मेवारी भने उपप्रधानमन्त्री श्रेष्ठले सम्हाल्दै आउनुभएको छ ।
मन्त्रिपरिषद्को कार्यालयका सचिव कृष्णहरि बाँस्कोटाले आफू सिन्धुलीमा जिल्ला प्रमुखहरूको बैठकमा व्यस्त रहेको र मन्त्रिपरिषद्को वेबसाइटमा रहेको त्रुटिका बारेमा आफूलाई जानकारी नभएको बताउनुभयो ।  त्यसो त नेपाल सरकारको आधिकारिक साइट नेपालजीओभी डट एनपी बाराम्बार ह्याकरको निशानामा पर्ने गरेको छ ।
www.gorkhapatraonline.com

Post a Comment

सूचना प्रविधि

टिप्स ट्रिक्स

विविध

 
Copyright © 2014 Connected With Information and Technology